Aste honetan zehar, Jesuitak Durangok hezkuntza eta kultur truke esperientzia aberasgarria bizi izan du. Joan den irailaren 26an iritsi zirenetik, Frantziatik etorritako bederatzi ikasle hartu ditugu ikastetxean, Véronique eta Nadia irakasleek lagunduta.
Bisitak gure kultura, gure hizkuntza eta gure eguneroko bizimodua ezagutzeko aukera eman die, hezkuntza komunitate osoarekin lotura berriak sortuz.
Zazpi egun hauetan, ikasleak Durangoko ikaskideen etxeetan egon dira. Horrela, familien harrera beroaz gozatu eta ikastetxeko bizitzan zuzenean parte hartu ahal izan dute. Gure inguruneko leku esanguratsuenetako batzuk ere ezagutu dituzte: Durangoko kale eta txokoak zeharkatzeaz gain, Bilbo, Gasteiz eta Gernika bisitatu dituzte. Bizikidetzak, kulturen arteko topaketak eta hizkuntzen ikaskuntzak markatu dute esperientzia osoa.
Espero dugu ikasleek zein irakasleek gure artean egindako egonaldiaz gozatu izana. Baina trukea ez da hemen amaitzen: lehen urratsa baino ez da izan. Datorren azaroaren 14an berriro elkartuko dira, oraingoan Montigny-le-Bretonneuxen, Parisetik gertu, non gure ikasleek aste bat pasako duten esperientzia osatzeko.
Eskerrak eman nahi dizkiegu proiektu hau posible egin duten familia, irakasle eta ikasle guztien inplikazioari. Horrelako ekimenek gure gazteen ikuspegia zabaltzen laguntzen dute, bizitzeko beste modu batzuk deskubritzen eta kultura eta mugak zeharkatzen dituzten harremanak eraikitzen.
Laster arte eta bidaia ona azaroan trukearen bigarren zatian parte hartuko duzuenoi!
