Euskaltel eta ALBOANek abian jarri dute «Lurraren aldeko mugikorrak», ekimen solidario eta ingurumenekoa: erabilerarik gabeko telefono mugikorrak entregatzera gonbidatzen du, haien berrerabilera eta birziklapena sustatzeko eta, aldi berean, proiektu humanitarioei eta ingurumenaren zaintzari laguntzeko.
Parte hartu nahi dutenek beren gailu zaharrak utzi ahal izango dituzte Euskadi eta Nafarroan dauden Euskaltelen 45 dendetan, baita Bilboko erdigunean dagoen Bizkaia Euskaltel Digital Center zentroan ere. Gune horiek bilketa-kutxak eta kanpainari buruzko informazio-materialak izango dituzte.
Bigarren bizitza bat gailuentzat
«Lurraren aldeko mugikorrak» ekimenak lotutako bi erronkari erantzun nahi die. Alde batetik, telefonoen erabilgarritasun-bizitza luzatu eta hondakin elektronikoen kudeaketa jasangarriagoa sustatu nahi du. Bestetik, berrerabileraren eta birziklapenaren bidez lortutako baliabideak proiektu humanitarioak eta ingurumenekoak babestera bideratuko dira.
Kanpainak, halaber, gailu teknologikoen fabrikazioari lotutako eragin sozial eta ingurumenekoaz kontzientziatu nahi du, eta bereziki, osagaiak ekoizteko behar diren materialak erauzteak dakarrenaz.
Julia Aramendik, ALBOANeko Enpresekin Aliantzen arduradunak, azaldu duenez, ekimenak eragin horren inguruan herritarrak kontzientziatu, gailuen erabilgarritasun-bizitza luzatu eta ekintza humanitarioak finantzatzeko baliabideak sortu nahi ditu.
Bestalde, Fernando Secok, Euskaltelen Marketin zuzendariak, azpimarratu du lankidetzak enpresak bere ingurunearekin duen konpromisoari erantzuten diola, eta gizartean eragin positiboa sortzeko gai diren ekimenak bultzatzeko borondateari.
Horrela, Euskaltel eta ALBOANen arteko aliantzak bide erraz bat eskaintzen du, jada erabiltzen ez dugun telefono batek bigarren bizitza izan dezan eta pertsonen zein planetaren zaintzan lagun dezan.
