Urteurrena dela-eta antolatutako lau topaketetatik azkena Iruñeko CIVICANen egin da, Gasteizko, Donostiako eta Bilboko ospakizunen ondoren.
1996an euskal eta nafar gizarteak nazioarteko elkartasunarekin duen konpromisoari lotutako ibilbidea hasi zen. Hogeita hamar urte hauetan, ALBOANek lankidetza- eta giza ekintzako proiektuak bultzatu ditu, baita hezkuntza-, sentsibilizazio-, mobilizazio- eta eragin sozialerako ekimenak ere Latinoamerikan, Afrikan eta Asian, bai eta Euskadin eta Nafarroan ere.
Urteurreneko topaketek erakundeetako ordezkariak, erakunde aliatuak, boluntarioak eta GKEaren ibilbideari lotutako beste pertsona batzuk bildu dituzte. Musikarekin, lekukotzekin, ikus-entzunezko lanekin eta elkarrizketa-guneekin, egindako bidea eskertzeko eta pertsonen bizitzari eragiten dioten munduko zein tokiko erronkei buruz gogoeta egiteko balio izan dute.
Ospakizuna ALBOANen aro berria aurkezteko abagunea ere izaten ari da, Jesusen Lagundiaren Euskadiko eta Nafarroako lau gizarte-erakunderen integrazio-prozesuaren emaitza: ALBOAN, Ellacuría Fundazioa, Loiolaetxea eta Padre Lasa Zentroa. Ekimenaren xedea da baliabideak, ezagutzak eta eskarmentuak bateratzea, kalteberatasunaren eta bazterkeriaren aurreko erantzuna indartzeko. Aurreikusita dago aro berri hori 2027ko urtarrilean hastea.
Azken topaketa azaroaren 18an izango da, 18:30ean, Iruñeko CIVICANen. Aurreko hitzorduak Gasteizen, Donostian eta Bilbon izan ziren.
