LEHENTASUN APOSTOLIKOAK
2026-2028
Justizia gauzatzen eta mundua eraldatzen duen fedea
Azken urteotan, Loiolako Plataforma Apostolikoko komunitate, obra, talde eta sektoreei entzun diegu, baita Espainiako Probintziako obra eta komunitateei ere, bizitasun handiena non sumatzen dugun eta norantz deituak sentitzen garen antzemateko.
Entzute- eta bereizmen-prozesu horren fruitua Proiektu Apostolikoa da. Gure esparruan, datozen urteetan misioa gidatuko duten hiru lehentasunetan gauzatzen da.
3 lehentasunak
Gure misioa gidatzen duten eta sei lan-ildotan gauzatzen diren hiru dei.
Fedearen esperientzia eta ignaziotar espiritualtasuna berritzea
Bizitzan Jainkoa aurkitzen
eta fedearen transmisioa berritzen
lagunduko duten esperientziak eskaintzea.
A · Barnekotasun- eta fede-ibilbideak
B · Fedearen inkulturazioa
Gizartean presentzia eraldatzailea sustatzea
Hospitalitatearekin, justiziarekin
eta guztion etxearen zaintzarekin
konprometitutako fedea ikusgarri egitea.
C · Hospitalitatearen kultura
D · Guztion etxea
Gorputz apostolikoa eta misio partekatua indartzea
Erantzunkidetasuna, lidergo berriak eta misio-komunitateak sustatzea, azken horiek kidetasunerako, bereizmenerako eta misiora bidaliak izateko gune izan daitezen.
E · Lidergo berriak eta erantzunkidetasuna
F · Misio-komunitateak
FEDEAREN ESPERIENTZIA ETA IGNAZIOTAR ESPIRITUALTASUNA BERRITZEA
Barnekotasuna · fedea · bidelaguntza · kultura
Bizitzan Jainkoa aurkitzen lagunduko duten esperientziak eskaini, fedearen transmisioa berritu eta barnekotasunerako, bidelaguntzarako eta kulturarekin topo egiteko bide berriak zabaldu nahi ditugu.
Kultura- eta erlijio-aldaketa sakonen testuinguruan, gaur egungo pertsonentzat esanguratsuak izan daitezkeen kristau-esperientzia eta ignaziotar espiritualtasuna proposatzeko moduak bilatzen jarraitu nahi dugu, arreta berezia eskainiz belaunaldi gazteei eta gure lurraldeko kultura- eta hizkuntza-errealitateari.
A · BARNEKOTASUN- ETA FEDE-IBILBIDEAK
Pertsonei barnekotasuna lantzen, Jainkoarekin topo egiten eta fedean hazten lagunduko dieten prozesuak sustatu nahi ditugu.
A1 · Dauden ibilbideak sendotu eta elkarren artean uztartu.
A2 · Gazteentzako barnekotasun- eta fede-proposamenak sustatu.
B · FEDEAREN INKULTURAZIOA
Fedeak bizi garen kultura zehatzean adierazteko eta kultura horrekin elkarrizketan jarduteko beharra du. Ebanjelioa iragartzeko eta bizitzeko moduak bilatzen jarraitu nahi dugu, gaur egungo galdera, hizkuntza eta sentsibilitateekin elkarrizketan sartzeko gai direnak.
B1 · Mundu euskaldunean fedearen inkulturazioa sustatu.
B2 · Fedea proposatzeko hizkuntza eta modu berriak sustatu.
GIZARTEAN PRESENTZIA ERALDATZAILEA SUSTATZEA
Hospitalitatea · justizia · ekologia integrala
Gizarte bidezkoagoa, abegikorragoa eta jasangarriagoa eraikitzen lagunduko duen kristau-presentzia ikusgarri egin nahi dugu, zaurgarritasun handieneko egoerak bizi dituzten pertsonei eta guztion etxearen zaintzari arreta berezia eskainiz.
Gure fedeak errealitatearekin konprometitzera garamatza. Horregatik, hospitalitatea, justizia eta ekologia integrala uztartzen dituen presentzia eraldatzaile batean aurrera egiten jarraitu nahi dugu.
C · HOSPITALITATEAREN KULTURA
Ekimen zehatzetatik abiatuta, Plataformako obra eta sektoreek partekatutako benetako hospitalitate-kultura baterantz aurrera egin nahi dugu.
C1 · Sektorearteko ekimenak indartu eta uztartu.
C2 · Sektoreen inplikazioan eta erantzunkidetasunean aurrera egin.
D · GUZTION ETXEA
Ekologiaren ulermen integralago baterantz aurrera egin nahi dugu, planetaren zaintza, justizia soziala, gure bizimoduak eta gure esperientzia espirituala elkarrekin lotzeko gai izango dena.
D1 · Ekologia integralaren ikuspegi komun bat sendotu.
D2 · Guztion etxearen zaintza obretan txertatu.
GORPUTZ APOSTOLIKOA ETA MISIO PARTEKATUA INDARTZEA
Bereizmena · lankidetza · komunitatea
Jesuitek eta beste pertsona askok osatutako gorputz apostolikoa eraikitzen jarraitu nahi dugu. Bokazio, erantzukizun eta erakunde desberdinetatik abiatuta, misio berean parte hartzen dugula aitortzen dugu.
Misio partekatuak erantzukizunak hartzeko, elkarrekin bereizmena egiteko eta bidaliak sentitzeko gai diren pertsonak behar ditu. Horregatik, bereziki zaindu nahi ditugu pertsona berriak misioan txertatzeko prozesua, erantzukizunak hartzen dituztenen bidelaguntza eta misio-komunitateen garapena, kidetasunerako, bereizmenerako eta misiora bidaliak izateko gune izan daitezen.
E · LIDERGO BERRIAK ETA ERANTZUNKIDETASUNA
Pertsona berriak misioan txertatzea sustatu eta gero eta erantzunkideagoak diren lidergo-moduak garatu nahi ditugu.
E1 · Pertsona berriak misioan pixkanaka txertatzea sustatu.
E2 · Bidelaguntza-prozesuak zaindu.
F · MISIO-KOMUNITATEAK
Obra, komunitate, sektore eta bokazio desberdinei lotutako pertsonen artean kidetasun- eta lankidetza-guneak sustatu nahi ditugu, elkarrekin topo egiteko, bizitakoa partekatzeko eta misioaren inguruko bereizmena elkarrekin egiteko.
F1 · Dauden komunitateak indartu eta haiei bidelagun izan.
F2 · Misio-komunitateetan parte-hartzea sustatu.
LEHENTASUNETATIK EKINTZARA
Lehentasunak Loiolako Plataforma Apostolikoaren komunitate, obra eta sektoreen artean partekatutako ekimenetan gauzatzen dira.
MigraGesto
Hospitalitatearen kultura
Migratzaileen eta errefuxiatuen errealitatea ezagutzera, horrekiko sentiberatasuna lantzera eta konpromisoa hartzera gonbidatzen duen proposamen partekatua.
Ecoloiola
Guztion etxea
Loiolako PAren ekimena da, guztion etxearen zaintza sustatzeko eta gure obra eta komunitateetan ekologia integralaren kultura bultzatzeko.
Misio komunitatea
Gorputz apostolikoa eta misio partekatua
Plataformako obra, komunitate, sektore eta bokazio desberdinei lotutako pertsonen arteko kidetasun-, lankidetza- eta bereizmen partekatuko guneak.
PROIEKTU PARTEKATUA
Lehentasun hauek ez dute egiten dugun guztia jasotzea helburu. Datozen urteetan bereziki zaindu nahi ditugun dei batzuetan arreta jartzen eta gure erabakiak, baliabideak eta lankidetza dei horietara bideratzen laguntzen digute.
Lehentasun horien garapena Loiolako Plataforma Apostoliko osoko komunitate, erakunde, sektore eta pertsonen inplikazioaren mende dago.
Elkarrekin bereizmenaren bidez argitzen eta eraikitzen jarraitu nahi dugun misio partekatua.
